ليه ربنا مبيعملش حاجه لما بيشوفنا بنتالم ليه بيرضى بكده ؟
سؤال غريب حقيقي سؤال غريب كل مرة الواحد بيسأل نفسه ومفيش اجابة لكن الاجابة وبكل بساطة ف قرأنا الكريم
فيه سورة في القرآن الكريم اسمها سورة الأحزاب ، عارفينها طبعًا، السورة دى بتحكي قصة غزوة ةهذه الغزوة من أصعب الغزوات اللي مرت على النبي صلي الله عليه وسلم وأصحابه.
وعشات يتضح لك الوضع : النبي صلي الله عليه وسلم كان معاه كام ألف واحد ، بمعنى اصح كان معاه كل قبائل العرب و قرر يتجمع وييجوا يستأصلوا المؤمنين دول عن بكرة أبيهم بقى ، من أولهم لآخرهم.
وبالتالي النبي صلي الله عليه وسلم استشار الصحابة وقالوا له نحفز خندق ، من ناحية المشركين ، راحوا يحفروا الخندق ، وهما حالتهم صعبة : جعانين جدًا ، ومش لاقيين أكل ، وسايبين شغلهم ، والنبي صلي الله عليه وسلم رابط حجر على بطنه من الجوع ، والدنيا هواء وبرد شديد ، والأرض صخرية جافة مش تراب سهل ، فبيحفروا بفؤوس ، وآخر فرهدة.
وفي وسط دا قاعدين بيقولوا إيه بقى؟
"اللهم لا عيش إلا عيش الآخرة ، فاغفر للأنصار والمهاجرة" ، نفسيات!
وبعدين؟ ، حفروا الخندق في ظل كل هذا الكم من التعب ، نستريح بقى ، لأ ، لقوا الكفار وصلوا ، وبالتالي لازم يباتوا في اماكنهم ، في الخندق!
والدنيا برد شديد ، لدرجة أن النبي بيقول لهم : من ياتيني بخبر القوم ويكون رفيقي في الجنة؟ ، ولا واحد منهم قام! ، تخيّل ، الصحابة دول مش إحنا ، مش شدة البرد.
خلصت كده؟ ، لأ ، يجيلهم خبر ان اليهود ، اللي هما في الناحية التانية في المدينة ، خانوا العهد!.
وهنا القرآن يوصف وأنا اسكت بقى ، قال تعالى : إِذْ جَاءُوكُم مِّن فَوْقِكُمْ وَمِنْ أَسْفَلَ مِنكُمْ وَإِذْ زَاغَتِ الْأَبْصَارُ وَبَلَغَتِ الْقُلُوبُ الْحَنَاجِرَ وَتَظُنُّونَ بِاللَّهِ الظُّنُونَا (10) هُنَالِكَ ابْتُلِيَ الْمُؤْمِنُونَ وَزُلْزِلُوا زِلْزَالًا شَدِيدًا (11) وَإِذْ يَقُولُ الْمُنَافِقُونَ وَالَّذِينَ فِي قُلُوبِهِم مَّرَضٌ مَّا وَعَدَنَا اللَّهُ وَرَسُولُهُ إِلَّا غُرُورًا
تخيل ناس وسطهم رسول الله صلى الله عليه وسلم! ، وزلزلزوا زلزالًا "شديدًا" ، و"تظنون بالله الظنونا" ، دا والنبي معاهم!
في قصة تانية ، في غزوة أحد ، النبي والصحابة كانوا منتصرين ، وفي ظرف دقائق اتقتل 70 واحد من أصحابه ومنهم عمه حمزة ، واتحول النصر لهزيمة ، والنبي شج رأسه ، وكسرت أسنانه والخوذة دخلت في جلد وجهه الشريف وجرحته!
وعاد المسلمون وقد هزموا!
تفتكر ليه ربنا سابهم يتألموا كده؟ ، وليه هما ما قالوش ، ليه يارب سيبت عبادك يتألموا؟
طب هو ربنا ما كانش قادر يعني ينقذ النبي بمعجزة وللا حاجة؟ ، بدل ما يجرح في وجهه الشريف صلى الله عليه وسلم!
المشكلة يا صديقي في الأسئلة دي إن إحنا بنفترض حاجتين :
أولًا : أنه ربنا لازم يورينا أنه تدخل مباشرة لحل مشاكلنا ، ودا قصور في فهمنا عن رب العالمين ، وعن الدنيا ، اللي هي دار ابتلاء أصلًا ، وعن حكمة الله تعالى ، اللي ممكن يقدر الشر على "نبيه" حتى لحكمة يعملها!
مين قالك أن دا مش خير ليك؟ ، هسألك سؤال : لو يوم القيامة جيت لقيت في ميزان حسناتك مليون حسنة ، ومليون خطيئة اتشالوا ، تقول دا من ايه؟ ، يقولوا لك : بالمرض الفلاني ، هتحس أن دا أحسن صح؟ طب ليه باصص تحت رجليك بس؟
بص لقدام ، للآخرة ، هتلاقي كل قدر الله خير.
وعشان كده النبي دعا : "اللهم بعلمك الغيب، وقدرتك على الخلق، أحيني ما علمت الحياة خيرا لي، وتوفني إذا كانت الوفاة خيرا لي ، اللهم وأسألك خشيتك في الغيب والشهادة، وأسألك كلمة الحق في الرضا والغضب، وأسألك القصد في الفقر والغنى ، وأسألك نعيما لا ينفد، وأسألك قرة عين لا تنقطع، وأسألك الرضا بعد القضاء، وأسألك برد العيش بعد الموت.
وأسألك لذة النظر إلى وجهك، والشوق إلى لقائك، في غير ضراء مضرة، ولا فتنة مضلة."
رزقك الله برد الرضا